إني صعيدي شعر/حسني السباعي
أنا بأفتخر إنى صعيدي
وقراري دايما دا ف إيدي
لا حد يقدر يحركني
ولا عمري باخلف مواعيدي
***********************************************************
طول عمري أنا جد ودوغري
وبكلمة واحدة من صغري
ولا حد يقدر يزعلني
عمر الحرام ليا ما يغري
ف الحق أنا قلبي حديدي
أنا بأفتخر إني صعيدي
***********************************************************
طول عمري راجل حقاني
ولاحاجة أبدا نقصاني
أستاذ رجولة وشهامة
والكل يتمنوا مكاني
أخلاقي بتعلي رصيدي
أنا بأفتخر إني صعيدي
***********************************************************
إللي في جيبي ماهوش ليا
حب البشر أغلى هدية
طول عمري كلمتي مسموعة
والكل بيشكروا فيا
نبع الكرم جوا وريدي
أنا بأفتخر إني صعيدي
***********************************************************
عمري ما أبيع إللي شاريني
و ح أشيله دايما ف عيوني
ياويله مين يغدر بيا
أو يوم يفكروا يخونوني
ولا يبقى ليهم ف رصيدي
أنا بأفتخر إني صعيدي
***********************************************************
دايما بأصون أهلي وناسي
وقلبي عمره ما كان قاسي
أنا عمري ما أنسى اللي كرمني
ولفضله عمري ما أكون ناسي
ويوم ما أشوفه دا يوم عيدي
أنا بأفتخر إني صعيدي
***********************************************************
أصل الصعيدي صاحب مبدأ
وعمره ما بالغلط بيبدأ
مناخيره دايما في العالي
زي الدهب عمره ما يصدأ
سنين كرامتي ف تجاعيدي
أنا بأفتخر إني صعيدي
***********************************************************
أموت وما أذلش نفسي
وأحب افكركوا بنفسي
صعيدي مش باقي ع الدنيا
والدنيا كاتمة على نفسي
قيدي يانار جوايا قيدي
أنا بأفتخر إني صعيدي
