ياللي ف بالي شعر/ حسني السباعي
الله يسامحك ياللي ف بالي
كنت أتمنى تسيبني ف حالي
كنت أتمنى ماشوفش خيالك
ولا تتعبني أيام وليالي
الله يسامحك ياللي ف بالي
*********************************************************
قبل ماشوفه عشت حياتي
كنت أسهر م الفرحة ليلاتي
عمري ماشلت ف قلبي هم
ولا سمعت ف مرة آهاتي
لحد ما لحظة ف صوته نادالي
الله يسامحك ياللي ف بالي
*********************************************************
الله يسامحك ع اللي باشوفه
ظلم وقسوة بكل حروفه
قلبي بسببك عاش بيعاني
عاش بيعاني رغم ظروفه
كنت ف وهم بإنك غالي
الله يسامحك ياللي ف بالي
*********************************************************
الله يسامحك بكرة تشوف
معنى القسوة ومعنى الخوف
وذنبي بكرة ح يخلص منك
ويبقى مصيرك مش معروف
طول عمره قلبك ما صفالي
الله يسامحك ياللي ف بالي
*********************************************************
قولي أسامحك بس إزاي
وأنا جرحي بينزف جواي
جرحي بيفكرني بغدرك
وظلمك ليا ح يبقى معاي
ولا ح أرجع لو طيفك جالي
الله يسامحك ياللي ف بالي
