.اليتيم شعر /حسني السباعي
إللي سابه أبوه وراح
قلبه مليان بالجراح
محتاجين نبقى ف حياته
طوق نجاة ساعة الرياح
***********************************************************
هوا محتاجنا نواسيه
نجري ونطبطب عليه
نرسم الضحكة ف شفايفه
نمسح الدمعة ف عنيه
***********************************************************
اليتيم أجمل حكاية
هوا محتاج للرعاية
نفسه يسمع كلمة حلوة
بعد أبوه محتاج وصاية
***********************************************************
ح تلاقيه دايما حزين
إتحرم من أبوه سنين
نفسه حد يجيبله لعبة
أو يقوله كلمتين
************************************************************
نفسه ينطق يقول يابابا
إحنا من بعدك غلابة
عمره عمي ما يبقى زيك
بعدك إنت عايش في غابة
***********************************************************
والله يابا واحشني صوتك
إنتهيت أنا بعد موتك
نفسي لحظة أدوب في حضنك
حتى واحشني سكوتك
***********************************************************
إنت يابا مالكش زي
بعدك إنت معدشي ضي
بعدك إنت كله مات
وإنت من جوايا حي
*********************************************************
نفسي أفضفض وأشتكيلك
ولما أتوه قلبي يناديلك
نفسي أسمع كلمة منك
وإنت بتقول شد حيلك
***********************************************************
إنت بس إللي فاهمني
ولما بأغلط بتخاصمني
كنت ليا ضهري وسندي
بعدك إنت الكون ظالمني
********************************************************
الحنان بعدك مفيش
والأمان بقى ماتلاقيش
بعد منك كله ضاع
حتى مش قادر أعيش
***********************************************************
اليتيم كلمة بتوجع
واللي مات عمره مايرجع
يابا ح أفضل أدعي ليك
صوت بلال ف الجنة تسمع
