جشع التجار شعر /حسني السباعي
كرتونة البيض سعرها ولع
والسكر مش قادر أجيبه
وفراخ ولحمة أنا مقاطع
وخضار أنا ناوي إني أسيبه
حتى الجزار ما بيرحمني
مع إني والله قريبه
جايين في زمانا وبنعاني
والكل أهو راضي بنصيبه
**************************************************************
ح نروح على فين منهم لله
جشع التجار دا مغرقنا
ماهو كله عمال بيفنن
ويخطط إزاي يسرقنا
إزاي عايز يغنى ويكبر
ولو يقدر نفسه يحرقنا
مش راضي أبدا بقليله
على طول بيقاسم أرزاقنا
************************************************************
أنا لو فكرت أشتري حاجة
ألاقيني خلاص راح أكون مديون
والفكرة خلاص انا بارفضها
ما أنا لو فكرت ح أكون مجنون
أنا كل ما افكر باتجنن
مش عارف ح أبقى إزاي و ح اكون
الدنيا إسودت قدامي
ولا عاد حواليا حد حنون
************************************************************
على رأي ريحاني ف أفلامه
لما قال الشيء ليه لزومه
والواحد فينا جاب آخره
مش ناقص غير رهن هدومه
صعبان عليه بس ولاده
خايف لا حد ف يوم يلومه
ويقولي ليه جبتني يابا
ماهو حظه قليل من يومه
************************************************************
فواتير الغاز والنور عالية
والمية ما عدتش بادفعها
والكتب إرتفعت أسعارها
نفسي أعرف مين إللي رفعها
الناس عمال تلطم وتصرخ
وياريت فيه حد بيسمعها
تجار عمال تسرق فينا
ويوماتي أسعار بتولعها
مالناش غير ربنا يرحمنا
ويخفف للناس أوجاعها
