.قاطع البيبسي .. شعر/حسني السباعي قاطع البيبسي ماتشربهوش دم إخواتك ما تبيعهوش شعب غزة أمانة ف رقبتك لما تقاطع مابينسوش مابينسوش اللي إنت عملته ولا يوم كدا نمت وأهملته ولا نسيت تدعيله في صلاتك ماهي دعواتك اقوى من أي كلام قولته قاطع قاطع ماتفكرش وإللي يقاطع مابيخسرش إنت كدا بتساعد إخواتك خليك جد و ماتهزرش قاطع منتج راح يأذيهم دولا إخواتك فكر فيهم فكر في عذابهم وساعدهم أوعاك تيجي ف لحظة عليهم أضعف شيء قاطع وإدعيلهم دعوة تخلي ملايكة تجيلهم أو نصر من المولى قريب يبقى ساعتها الظلمة ياويلهم يارب انصر غزة وناسها ويفضل شعبها رافع راسها ويكون النصر دا حليفها والأمة كفاية في نعاسها قصرنا ياغزة وسامحينا وياريت تقصيرنا بإيدينا سامحينا ماتت ضمايرنا وضمايرنا بتعذب فينا ح نقاطع بيبسي وكوكاكولا زي ما قطعناكي يارجولة لما نسكت ع الظلم ف غزة و بنفرح للكورة في بطولة دا الفاشل أصبح أسطورة ومثلنا بقى نجم الكورة و ف غزة بيموتوا يوماتي والقتلة باينين ف الصورة ماتقاطعوا كنتاكي وزمايله ماهو مسؤل والذنب دا شايله على موت العشرات ف غزة ربك ع الظالم وعمايله منك يا غزة إتعلمنا ولاظالم يوم راح يهزمنا و ح نضحي بالروح لوطنا ولا فيه جراح راح تألمنا مكسوف منك وشايل العار واقفة لوحدك وسط دمار نفسي لو أقدر إني أساعدك وابقى ف ضهرك ليل ونهار يكفى كلام العالم عنك كله ياغزة إتعلم منك يعني إيه تضحية وبسالة وتلهمي كل الدنيا بفنك علمتينا قيمة الأوطان وإزاي وسط الحزن يبان فرحة تنور كل بيوتنا وإيمان يملا الدنيا أمان علمتينا صوت الحق دايما عالي وإن كرامتي عندي تمنها دايما غالي علمتينا معنى العزة ف وسط الضلمة وإن اليأس ما يخطر مرة ف يوم على بالي علشان كدا ح أفضل ادعيلك وبكلماتي راح أغنيلك تفضلي غزة مثلنا الأعلى ونصر المولى راح يناديلك
