حادي بادي … شعر/حسني السباعي
حادي بادي كرنبي زبادي
إللي بيحصل دا مش عادي
وإللي بيسكت ع إللي بيحصل
ييجي يواجهني ويقف قصادي
بس يكون حقاني وهادي
حادي بادي كرنبي زبادي
***********************************************************
بعد ما غزة لوحدها عانت
سلبية أمتنا أهي بانت
ولا فيه حد واقف جنبيها
ولاحد من الأمة يساند
كله يقولك غزة البادي
حادي بادي كرنبي زبادي
***********************************************************
غزة بتصرخ مين يسمعها
مين ح يخفف من أوجاعها
مين يساعدها ضد الظالم
شكله كله خلاص كدا باعها
مهما تصرخ مهما تنادي
حادي بادي كرنبي زبادي
***********************************************************
إزاي تقدر بس تنام
وتلعب كورة وتشوف أفلام
دم خواتك مش بيأثر؟
ومقضيها يوماتي في كلام
وعامل نفسك كدا مش فاضي
حادي بادي كرنبي زبادي
***********************************************************
غزة بتصرخ مين ينجدني
مين ح يساعد ومين يسندني
أنا محتاجة ليكي ياعروبة
مين من قلب النار يبعدني
شايفة ضميركم آمن وراضي
حادي بادي كرنبي زبادي
***********************************************************
أنا ماصعبتش مرة عليكم
وأنا محتاجة لمد إيديكم
كل الناس إتعاطفوا معايا
نفسي تبصوا من حواليكم
واحنا ف وادي وانتوا ف وادي
حادي بادي كرنبي زبادي
***********************************************************
لو فيه محكمة رايح أحكيلها
على أمتنا وعلى تقصيرها
عايزة شهود يشهدوا بالحق
لو كان يرضيكم عمايلها
سمعني حكمك ياقاضي
حادي بادي كرنبي زبادي
***********************************************************
وقف القاضي وكان مذهول
مش عارف ينطق ويقول
واضح إنه حاسس بالعار
وعارف إنه مفيش حلول
قال إعدام لكل بلادي
حادي بادي كرنبي زبادي
***********************************************************
وحكم لغزة بالتعويض
وعارف إنه ماعدشي جديد
وشرف الأمة بقى ف الطين
حتى تاريخها راح في حديد
شركا جميعا المرة دي
حادي بادي كرنبي زبادي
