ضريبة الغربة شعر/حسني السباعي
إيه خدنا م الغربة
غير الوجع والضيق
ولادنا بيسافروا
وبيرجعوا ف صناديق
كان كل أحلامهم
كلمة تبل الريق
وحلم جواهم
راسمله ألف طريق
سافروا وداقوا المر
من غير قريب وصديق
رجعوا في أكفانهم
مابين قتيل وغريق
إيه خدنا م الغربة
غير الوجع والضيق
*****************************************************
ياغربة ما كفاية
ياما وجعتينا
لو للولاد شغلة
كان عاشوا وسطينا
اتغربوا وفاكرين
راح يرجعوا لينا
راح يرسموا الفرحة
والضحكة ف عنينا
يا بلادنا فين دورك
ياريت تواسينا
وبدال ما نرتاحلك
بتعذبي فينا
هوا إحنا مش منك
ولا انتي بعتينا
صار الفراق بينا
ولاعاد أمل لينا
ولا عدنا إيد واحدة
وبقينا ألف فريق
إيه خدنا م الغربة
غير الوجع والضيق
*****************************************************
سافروا وجواهم
أحزان من بلادهم
هيا إللي خلتهم
يرتاحوا ف بعادهم
هيا إللي خلتهم
يزيدوا ف عنادهم
قال يعني ف الغربة
ح يحققوا مرادهم
لا مؤهل بينفع
ولا علم يوم فادهم
م الهم والقسوة
أحلام وردية
فاكرين ف الغربة
طيبة وحنية
فاكرين خلاص عدوا
ولا عاد فيه أسية
عاشوا في أوهامهم
والوهم دا أذية
شافوا الأذى والويل
شربوا العذاب في كاسات
لاشافوا يوم فرحة
ما الغربة ويل وآهات
يارب صبرنا
وارحملنا الأموات
ماهو الشباب لما مات
من ذنبه مافي بريء
إيه خدنا م الغربة
غير الوجع والضيق
