خسارة فيك شعر/حسني السباعي أقرب ماليك خلاك غريب إوعاك تقول عليه حبيب دا معدشي ليك اقرب ماليك علشان نسيك و ف لحظة باع من غير وداع نسيك وخان إكمنه كان كداب زمان قال إنه حبك عاشق لودك وفي الحقيقة عمره ماحبك ولاخاف عليك كان فرحته لما يشوف دمعة ف عينيك عمره ماعشقك ولا حس بيك من البداية رسم النهاية ومستني ليك على أي ذلة وناوي ع المذلة ولاراح يطبطب ولا ح يواسيك خبى وضوحه حقق طموحه وبقاله عيلة عيلة جميلة وطز فيك طز ف سعادتك تولع سيادتك كدا غصب عنك او بإرادتك دورك خلاص دورك إنتهى وتاريخ صلاحيتك برضو إنتهى وإنسى المبادئ وإنسى القيم وأي حاجة قولتها وإنك إنسان وليك كيان وليك مكان زي زمان كله إنتهى إعمل طابور وياريت تغور من وشهم سافر بعيد خليك وحيد بس المهم أنك بتبعد عنهم كفاية تاكل كفاية تشرب كيف الغنم مالكش رأي ولا ليك حقوق ما أنت صنم تنسى إللي فات والذكريات وإن إنت كنت محترم إسمع كلامهم ونفذه وبلاش كدا يتنرفزوا ويزودوا جرحك ألم دولا وحوش يتلذذوا يعذبوك ويوعظوا ولا مرة حسوا بالندم إنت باقيلك في الحياة يدوب يومين ومفيش مكان تهرب إليه وتروح لفين ماهو دا حصاد تعب السنين تور في ساقية ومغمين لييه العينين بعت عمرك بالرخيص عمرك إنت ضاع فطيس خدها مني وإسمع كلامهم عمر ما ضميرهم ألمهم ياللا إلبس الكفن ما أنت عايش ف العفن إيه نهاية رحلتك والكفاح كله إدفن حتى شكرا مابيقولوش وإن صرخت مايسمعوش إنت تقعد جنب حيطة بركة تستنى مماتك والجميع راح يرضوا عنك لما يسمعوا صوت سكاتك إنت مش مأسوف عليك غور في داهية مين شاريك وإللي زيك موته راحة إوعى تزعل م الصراحة كان بودي إني أواسيك حتى كلمة الله يعوض والله برضو خسارة فيك
