طيبة قلبي شعر/حسني السباعي طيبة قلبي مشندلة حالي وشايل الهم أيام وليالي عايش أفكر أسعد غيري عمري ما قولت ف يوم وأنا مالي طيبة قلبي مشندلة حالي رغم دا كله الناس ظالماني ومن قسوتهم ياما بأعاني بيقولوا عني ياما أذيتهم وفيهم كتير م الناس بايعاني وربنا ياخدك ياللي ف بالي طيبة قلبي مشندلة حالي بأعمل ياما على قلة فايدة غدر وخسة وخيانة زايدة ولا في حد لقيته يدعيلي نار الغيرة ف قلوبهم قايدة كله شايفني ف برجي العالي طيبة قلبي مشندلة حالي جيت الدنيا وهمي بيكبر ومشاكلي عمالة كدا تكبر مش لاقي حد واقف جنبي وعيون الناس الله أكبر حاسديني على قلة مالي طيبة قلبي مشندلة حالي إللي باصيصلي مايشيل شيلتي وياريت يبطل يجيب ف سيرتي أصل أنا فيا إللي مكفيني نفسي يعيشوا زيي ف حيرتي ومش عايز أسمع صوتكوا العالي طيبة قلبي مشندلة حالي دايما باصين ع إللي ف إيدنا ومش حاسين إزاي تعبنا مش عايزين الخير للناس حسد عنيكم دا إللي صايبنا وسبب الهم إللي بيجرالي طيبة قلبي مشندلة حالي
