كله رسوب شعر/حسني السباعي اللي ماتصعبش عليه غزة يبقى ماعندوش روح ولا دم فين النخوة وفين العزة وفين عروبتنا ديا أهم فين حكامنا وفين رؤساءنا كله بقى أخرس وأصم كله بقى خايف ع الكرسي حتى لو كان متعاص دم إنتوا يوماتي ف إحتفالاتكم واحنا ف ضلمة ورعب وغم كان نفسنا تبقولنا سندنا ونحس الكل بيهتم فين الجيش العربي بتاعكم ولا خلاص بيتاجروا ياعم جيش بيبيع مكرونة وبلطي ماعدشي على الجبهة بيتلم خايف لا يكون نسيوا الحرب وبقى يشخر وبيحلم يحلم إنه يكون ثروة ويبقى ثقافة وفكر أعم وتغور غزة ويغور ناسها ماحنا تعبنا كفاية حروب ماهو مابقاش الدم بيجري جوا وريدنا بقى خروب مات القلب وزرعوا بداله جوا صدورنا قوالب طوب وازاي بتطبطبوا ع الضارب وكمان تيجوا ع المضروب إمتى ياغزة ضميرهم يصحى وينصروا مرة فيها المغلوب هيا خطة عشان يبيدونا وهوا دا الهدف المطلوب هما يشربوا دم خواتنا واحنا نحاسب ع المشروب إللي بيشرب من كوكاكولا لإمتى ضميره يفضل مسلوب مابقاش إللي ف غزة يحبه ولا بقى ليهم تاني مرغوب دي الخطة المفروضة علينا دولا أصحاب أقذر أسلوب رمز الخسة وعلى طول جبنا كل صبح مننا مرعوب لما تبخه يطلع يجري جبن في تاريخهم مكتوب إمتى يا حكام بس تفوقوا فخ ولينا كلنا منصوب غزة ح تفضل غالية علينا و ح نرسم حواليها قلوب و ح نفضل ندعي لشهدائها يمكن فجأة العاصي يتوب يكفى المولى معاكم دايما وإنتوا نجحتوا وكله رسوب
