في شرع مين؟شعر/حسني السباعي
يرضى مين يا مسلمين
يرضى مين و ف أي دين
الأقصى راحت حرمته
والقدس فين قدسيته
والطفل سامع صرخته
انقذوا شعبي الحزين
يرضى مين و ف شرع مين
***********************************************************
الحق ضاع واحنا ف سكوت
و ف كل يوم عشرات تموت
فين الضمير فين البشر
الظلم ليه بنّا انتشر
عايزين نودع السكات
عايزين نرجّع اللي فات
وكفاية يا قهر السنين
يرضى مين و ف شرع مين
***********************************************************
طول م العرب متفرقين
تلقي الشعوب متعذبين
أطفال تموت إيه ذنبها
وأمهات في قلبها
أحزان ح تفضل عمرها
فاكراها على مر السنين
يرضى مين و ف شرع مين
***********************************************************
ليه الأمان غاب عننا
مات الزتون على أرضنا
حتى الحمام مبقاش هنا
والحلم ضاع
ويّا اللي ضاع
ليه يا عرب متقسمين
يرضى مين و ف شرع مين
***********************************************************
سلاحكوا هوّ الاتحاد
طول عمركوا عايشين بعاد
كفاية غربة وقرّبوا
ورجّعوا مجد البلاد
عهد البطل صلاح الدين
يرضى مين و ف شرع مين
***********************************************************
في كل بيت ذكري شهيد
شهدا كتير ملهاش عدد
فجر الأمل غايب بعيد
والشمس محتاجة المدد
لازم نودع الانقسام
ونقضي على روح الانهزام
دم الشهيد غالي التمن
مهما يمر عليه زمن
وكلنا ضد العدا
وكلنا رهن الفدا
نفدي فلسطين
تحيا فلسطين
رغم أنف المعتدين
يرضى مين و ف شرع مين
