إستنى .. شعر/حسني السباعي الأسعار نزلت ع النت والتجار عاملين من بنها كل الناس بتكلم روحها ربنا والله يكون ف عونها لما تقوله ياعم دي رخصت يقول إشاعات واحنا متابعينها بنقول للتجار الرحمة يقولوا الرحمة بنسمع عنها عمال نصرخ م الأسعار مش قادرين على دفع تمنها أسعار الفاكهة فلكية والأسماك بقت معدية واللحمة ماتسألش عليها ولا حتى عند الجمعية مش قادرين نشتري مستورد مش لحمة بلدي ف مزارعنا والفرخة البيضة وحشتنا شكلنا كدا للفقر رجعنا والتجار مش حاسين بينا كل شوية يغلوا علينا وكأننا عايشين ف غابة كله عمال ينهش فينا حد يقول للناس دي حرام ليه سايبين ضمايركوا تنام كله عمال يبيع على كيفه ولا في رقابة وكله كلام فين حقوقنا فين ياخوانا مش قادرين ولا يوم نتهنى ولاقادرين ناكل ولانلبس كل شوية يقولوا إستنى إستنى.. ما الخير أهو جاي إستنى.. إستنى شوي أصبر يامواطن وإستنى وإحمد ربك إنك حي لو ملبستش مش ح تموت لو ماسكنتش عيش مبسوط وبلاش لحمة وبلاش فاكهة ماهو كدا كدا عمرك ح يفوت أوعى تقولي فين حقوقي حقوقك مين دا أنت هلفوت مش بتفكروا غير ف بطونكم بأدعي ربي يكون ف عونكم ليل ونهار عايشين ع الأكل نفسي تفكروا في غذا عقولكم مالناش غير ربنا ينقذنا وكمان مشايخنا توعظنا لجل الغمة ماربي يزيحها كلنا من همنا عجزنا
