قطر الحظوظ شعر/حسني السباعي قطر الحظوظ طلع محجوز ومالقيتش فيه ليا أماكن فضلت أدور جوايا يمكن ألاقي حظ معايا مالاقتشي غير هم وساكن قولت أما أدور حواليا يمكن ألاقيلي شوية لقيت ورايا نحس وراكن قولت أما أدور ع الألوان على لون يخلي الحظ يبان اللون طلع إسود داكن قولت أما أدور ع الفرحة ف وشوش صحابي تكون طارحة مالاقيتشي فرحة ولكن لقيت على وشوشهم أحزان والضحكة غايبة بقالها زمان طلعوا الصحاب زي حالاتي همومنا بتزورنا يوماتي ولايوم سابتنا ونسيتنا ولا عمر دا حصل في حياتي يادنيا ليه حظي قليل وكل مادا بيتنيل ولو حلمت ف يوم أفرح الفرح عندي بيميل قطر الحظوظ ليه عداني وسابني واقف في مكاني ولا مرة طبطب وصالحني وكأني من كوكب تاني أنا ع الحظوظ مين يصالحني ولو كنت غلطان يسامحني لو الحظوظ رضيت عني حاجات كتير ح تفرحني يا حظوظ ما ترضي علينا مرة علشان حياتنا بقت مرة لا حظ لاقيين ف بيوتنا ولا حظوظ لاقيين برة الحظ رد.... قال إيه ذنبي خلاص أنا مش راح أخبي أنا كل مرة آجي أزورك النحس يقول خليه جنبي العيب طلع مغروس فيا والنحس دا مخلوق ليا سامحني يا حظ ظلمتك النحس دا مولود بيا
