إلى أمي شعر… حسني السباعي
باقة ورد وألف تحية ومليون بوسة يا أمي عشانك
دا إحنا كبرنا بفضل رعايتك عيشتينا ف بحر حنانك
يا ما تعبتي…..يا ما قسيتي
لا ف يوم ثرتي… ولا مليتي
بكل العطف رعايتك لينا
دا إنتي الشمعة إللي ف وسطينا
فضل نجاحنا يرجع ليكي
كله يا أمي بفضل إيمانك
باقة ورد يا أمي عشانك
***********************************************************
خايف اكون قصّرت ف حقك…خايف قلبك يقسى عليا
خايف اكون ف زحام الدنيا ف لحظة نسيتك مش بايديا
يا ام القلب الطيب سامحي
صورتك واضحة ف كل ملامحي
خلي تسامحك يمسح جرحي
يرسم فرحة جوّا عينيا
بانسى همومي وعذاب يومي بين احضانك
باقة ورد يا أمي عشانك
***********************************************************
مين م الزمن الطيب ليا …..غيرك إنتي يا أغلي الناس
مين بيحب وليدك قدّك……..قلبك عامر بالإحساس
وإحنا صغار كنتي بتهدينا
وإحنا كبار بتخافي علينا
دعاكي الطاهر بينجينا
هوّ حقيقي أغلي ميراث
مهما يزيد الصعب يا أمي…..كل الصعب يهون بحنانك
باقة ورد يا أمي عشانك
*************************************************ويشرفني يا أمي أعيش……..خادم دايما من خدامك
ياللي المولى شرّف قدرك……خلّي الجنة تحت قدماك
أمي معاكي بعيش في أمان
لمسة حب وشوق وحنان
أمي مفيش زيك إنسان
خايفة عليا ف عز ألامك
مين بيفكر زيك فيّا….نفسي أعيش على طول في زمانك
باقة ورد يا أمي عشانك
