إحمد ربك شعر/حسني السباعي
إحمد ربك واشكر فضله
إنت كتير أحسن من غيرك
ح تلاقي غيرك ربنا حرمه
وإنت كتير ربنا مديلك
ح تلاقي ياما عيون بصالك
وكتير من حواليك حاسدينك
شوف كام واحد كدا محتاجلك
ح تلاقي ياما ناس عايزينك
شوف السمعة الحلوة بتاعتك
تلقى ياما كتير عارفينك
حب المولى دا أكبر نعمة
خلى كل الناس حابينك
دا بيحبك ودا بيصاحبك
ومنهم ياما كتير عاشقينك
إحمد ربك واشكر فضله
إنت كتير أحسن من غيرك
***************************************************
إحمد ربك عندك صحة
بتاكل إللي نفسك فيه
غيرك نفسه ياكل زيك
والحرمان باين ف عنيه
اللقمة عنده بحساب
حاسس الدنيا جاية عليه
م الأمراض تلاقيه مهموم
والكل عمال يواسيه
وإنت بصحة وعافية كفاية
وغيرك عايز إيد تداويه
إحمد ربك وكتر خيرك
إنت كتير أحس من غيرك
إحمد ربك واشكر فضله
***************************************************
إحمد ربك عندك عيلة
مالية الدنيا من حواليك
لو حسيت إنك مهموم
تلقى الكل بيجري عليك
لو مرة تعبت أو عييت
شوف كام واحد كدا يراعيك
لو مرة كدا زعلت ف عيلتك
شوف كام واحد يسترضيك
لو حسيت بالحزن ف لحظة
شوف كام واحد يسأل فيك
ساعة الهم الكل نصيرك
إنت كتير أحسن من غيرك
إحمد ربك واشكر فضله
***************************************************
غيرك محروم نفسه ف عيلة
غيرك قصة بؤس طويلة
غيرك مش لاقي بيت يأويه
ولا شغل بيتقوت بيه
ولا ليه حد بيسأل فيه
ربك عادل ومقسمها
كله واخد حقه وزيادة
إنت صحة وغيرك مال
والكل عايشين في سعادة
إحنا أكيد بنكمل بعض
بس يكون بقناعة وإرادة
و ف آخرتها القبر مصيرك
إنت كتير أحسن من غيرك
إحمد ربك واشكر فضله
إنت كتير أحسن من غيرك
***************************************************
