في زمن السرعة والمظاهر، بقى النصاب أذكى من زمان، يلبس وش الطيبة، ويكلمك بحنية، ويوهمك إن الخير جاي على إيده. يوعدك بمكسب أو فرصة أو مساعدة، لكن أول ما تطمن له، يختفي ويسيبك تاكل الندم بإيدك.
النصاب مش لازم يلبس بدلة أو يفتح مكتب، النهارده ممكن يكون صفحة على الفيس، أو رقم على واتساب، أو حتى شخص بيقولك “أنا جاي أساعدك”. لكن الحقيقة إنه داخل حياتك بخطة محبوكة علشان يستغل ثقتك.
بيبدأ بكلمة حلوة… يوهمك إنه جاد، يديك وعود كبيرة، “هنزودلك متابعين، هنعملك مشروع، هنوصلك بجهة مسؤولة” — كلها وعود على ورق. وأول ما تحول الفلوس أو تثق فيه، يختفي كأنه ما كانش.
وهنا لازم نسأل نفسنا:
فين وعينا؟ وليه نصدق بسرعة؟
المفروض نتأكد قبل ما ندي بياناتنا أو فلوسنا لحد. نتعامل بالعقل، مش بالعاطفة، لأن الطيبة من غير وعي ممكن تبقى باب للنصب.
نصائح مهمة تحميك من النصب والاحتيال
ما تبعتش أي فلوس أو كروت شحن أو أكواد لأي شخص أو صفحة مش موثوق فيها.
اتأكد من العلامة الزرقا في الصفحات الرسمية، وما تتعاملش مع صفحات مقلدة.
ما تشاركش بياناتك الشخصية (زي الرقم القومي أو صور بطاقتك أو حسابك البنكي) مع أي جهة على الإنترنت.
4. لو حد وعدك بشغل أو منحة أو مكسب سريع، اعرف إن ٩٠٪ من الحالات دي نصب.
5. اسأل واتأكد بنفسك من الجهة اللي بتتعامل معاها قبل ما تصدق أي عرض.
6. بلغ فورًا عن أي صفحة أو شخص بيحاول يحتالك، سواء على فيسبوك أو عن طريق الخط الساخن التابع لوزارة الداخلية أو مباحث الإنترنت.
