يعيش البجح على قفّ المكسوف بقلم الاعلاميه دكتوره غاده قنديل في زمن البجاحة، بقى اللي ملهوش كرامة هو اللي بياخد حقه بالعافية، واللي محترم بيتقال عليه طيب زيادة عن اللزوم! النهارده بقينا نشوف نوع من الناس مايعرفش يعني إيه حدود، لا بيخجل ولا بيحترم، عايش طول عمره على حساب اللي عندهم حياء وضمير. البجح داخل ياكل من مجهود غيره، وياخد مكان مش بتاعه، ويضحك على وش الناس بكلمتين حلوين وهو عارف إن اللي قدامه مش هيواجهه. هو مش ذكي… هو عارف بس إن اللي قصاده عنده أدب، والمشكلة إن الأدب عندنا بقى بيتفهم ضعف! اللي مكسوف دايمًا بيسكت، واللي بجح بيفضل يزق ويزق لحد ما ياخد اللي هو عايزه. هو دا الاستغلال في أوضح صوره — بجاحة بتتغذى على سكوت الناس، وضمير بيموت كل يوم قدام اللي مش فارق معاهم لا كرامة ولا حق. لكن الحقيقة؟ اللي ساكت مش ضعيف… ده محترم. واللي بجح مش قوي… ده عايش على فتات غيره. بس يوم ما المكسوف يفوق، البجح مش هيلاقي أرض يقف عليها. فوقوا يا محترمين… السكوت مش دايم، والحق مش لعبة. ماتسيبش البجح يعيش على قفّك، ولا تسيب استغلاله يعدّي كأنه شطارة. احترم نفسك، بس خليك واضح… لأن اللي بيسكت عن حقه، بيدي غيره تصريح يسرق عمره وهو مبتسم.
