شحات شعر/حسني السباعي لما المرتب ينتهي أعراض كتير تظهر الموود بيتغير وبتهمل المظهر والوش يبقى كئيب وحزين ومش طايق وتفكر كتير تسرح وتشحت في شوارع الأزهر تصعب عليك روحك والمحفظة فاضية وتحس بالخنقة والنفس مش راضية والوقت مش بيمر واليوم بألف سنة ولو حد قالك هات تديله بالقاضية عمال بتحسبها وقربت تتجنن عمال تجيبها يمين وعمال تجيبها شمال وعمال بتفنن خايف محصل نور ولا بتاع الغاز على بابك يخبط ساعتها خلف الباب إصرخ وقول يحنن مكتوب على فلوسك يلا سريعا مارش من بعد يوم ويومين مطلوب تعدي المانش ما إنت بقيت غرقان وسط بحور الدين طلع المرتب خسيس ولعشرتك ماحسنش معظم شهور السنة وأنت إللي شايل الطين والهم دا بينساك ف الشهر بس يومين يقف الزمن بعديها وانت في غيبوبة عايش ناسي الأفراح قلبك تملي حزين عمرك ياصاحبي خلاص ح يضيع مع الحسابات ماشي ف طريق عتمة وتعبت م الطلبات ولا حد قال يوم خد كله يقولك هات ح تعيش ياصاحبي وتموت وإنت فقير شحات
