وأنا لسه ناشئ صغير في الأهلي، المدرب قالّي إن بكرة أول ماتش ليا مع الفريق، وأنا جاي من الفيوم ومش عارف هبات فين ولا أعمل إيه.. دخلت أصلي المغرب وقعدت على جنب، لقيت عم غريب والد صاحبي محمد – اللي كان معايا في الفريق وقتها – سألني: “هتعمل إيه؟”، قلتله “مش عارف”، فقال لي “تعالى بات معانا النهاردة”.
ومن يومها، رغم إن ابنه ساب الفريق بعد سنة، لكنه فضِل جنبي يشجعني ويتابعني ويعتبرني زي واحد من ولاده. الجميل ده عمري ما هقدر أردّه. السنة دي لما توفى حسيت إني فقدت أبويا للمرة التانية. عمري ما قلتله إني بحبه، بس وانا رايح لربنا هقوله إن أي حاجة حلوة فيا هي في ميزان حسنات الراجل ده.
