أحد المعلقين يرد هو ليه الناس بتقول على لابوبو لعبة شيطانية ؟
متابعة… د شيماء عراقي
على رسالة على الفيس بوك بحدوث حركات مريبة من اللعبة
و هل ده مجرد تخو_يف ولا فيه دليل على الكلام ده؟ خصوصًا لما يطلع ساحر أمريكي ويتكلم عنها ، طيب ايه حكاية الناس الي بتقول عن مواقف مش طبيعية بتحصل معاهم من وقت ما اشتروا الدمية ديه
في المقال ده هنتكلم عن بداية ظهور لابوبو مرورا بكل الكلام المرتبط بيها سواء من كلام منتشر على السوشيال ميديا او تجارب حصلت لبعض الناس ، بس قبل ما ابدأ انا مش بنقل وجهة نظر شخصية ولا عندي دليل على أي شئ ، انا مجرد بجمع بعض المعلومات وبعرضها عليك، انك تصدق من عدمه ديه حاجة ترجعلك
الحكاية بدأت سنة ٢٠١٠ في الصين لما فتح شخص اسمه “وانغ نينغ” محل صغير لبيع الألعاب بتاعت الأطفال ، لحد ما تيجي سنة ٢٠١٦ ويقرر نفس الشخص انه يدخل عالم الblind boxes
وديه بتبقي عبارة عن علبة مقفولة انت مش عارف ايه الي جواها تفتحها وانت وحظك في الهدية الي هتطلعلك ،ده في حد ذاته اسلوب بيجذب كتير من الناس أنهم يجربوا حظهم في الهدية الي هتطلع في العلبة وبيزود نسبة مبيعات المنتج بطريقة ضخمة وده فعلاً الي حصل
في اخر ٢٠١٦ بيدخل وانغ نينغ في شراكة مع فنان اسمه كاسينج لونج، نتج عن الشراكة ديه انتاج سلسلة العاب اسمها the monsters والي كان من ضمنهم شخصية لابوبو labubu
سنة ٢٠١٩ كانت اول نسخة تنزل من العروسة لابوبو ، حرفيًا الناس كنت بتقف طوابير عشان تشتريها بألالاف الدولارات وعشان يتصوروا معاها ،في خلال سنتين بس شركة pop mart وديه الشركة المصنعة ل لابوبو نزلت البورصة وجمعت ٦٧٦ مليون دولار من بيع الدمية
لحد ما تيجي سنة ٢٠٢٤ وديه السنة الي انفـ..جرت فيها الشركة من حيث نسبة المبيعات الي تخطت ١.٨ مليار دولار ، لابوبو لوحدها حققت فيهم اكتر من ٤١٨ مليون دولار مبيعات
لك انت تتخيل أن في اول ٣ شهور بس من سنة ٢٠٢٥ نسبة المبيعات زادت ٤٠٠ في الميه ، وده بعد ما ظهر بعض النجوم العالميين وهما متصوريين بي لابوبو زي اللاعب ديفيد بيكهام والمغنية ريانا ده غير بعض الفنانين العرب، غير كمان التريند على السوشيال ميديا والبروجاندا والهاشتجات الي اتعملت عن الدمية الي خلى شهرتها في كل مكان في العالم
انا عاوز اقولك إن فيه نسخة من لابوبو شكلها نادر جدًا ، النسخة ديه اتباعت
في مزاد بي ١٧٠ الف دولار انت متخيل الرقم ؟
الغريب ان لعبة زي لابوبو بـ عيون واسعة وانياب شكلها مُخيف وموجهة للأطفال وده في حد ذاته حاجة مريبة ، ليه لعبة موجهة للأطفال تكون بتصميم مرعب زي ده،وده كان سبب الجدل والي خلي الناس تقول ان اللعبة شكلها مُقتبس من شكل شيطان كان موجود في كتب السحر اسمه bazuzu خصوصًا إن الاسمين متشابهين بشكل كبير
من هنا الكل بدأ يركز مع الشخص الي صمم الشخصية ديه والي قولنا اسمه كاسينج لونج فنان او رسام، الشخص ده سافر من وهو عنده سبع سنين من هونج كونج لهولندا ، هناك اتأثر بـ اساطير شمال أوروبا خاصًة قصص الجنيات
الشخص ده قال في مقابلة تليفزيونية انا كنت مفتون بالقصص ديه وكنت برسم شخصيات مستوحاه من عالم الخيال للحقيقة، وان لابوبو بنسباله كائن غريب ، فيه من البراءة وفيه من الغموض ، ملامحها مش مريحة بس من جواها قلب طفل، وقال انا عاوز كل واحد يشوفها بطريقته يمكن يشوف نفسه فيها
نيجي بقي لبعض الفيديوهات الي انتشرت وبتتكلم عن ساحر امريكي تائب قال عن نفسه انه خدم ابليس لمدة ٢٥ سنة كاملة ،عمل فيهم طقوس واشكال مختلفة من صور السحر ، الساحر ده لما سألوه عن لابوبو قال جملة واحدة بس ” اللعبة ديه مش بريئة” وقال كمان انا شوفت رموز تشبه وش الدمية ديه في طقوس وكتب سحر
الغريب في الدمية ديه أن مفيهاش الرعب الي يخضك ، بس في نفس الوقت انت حاسس انك مش مرتاح وانت بتبصلها ، حاسس إن فيها حاجة غريبة بس مش عارف تفسر إيه هي ،ليه لعبة اطفال مصممة بالشكل ده
علم النفس بيسمي الظاهرة ديه قُبح مغلف بالجمال ، وإن الاطفال بتتعلق بالحاجات الي فيها عناصر مفاجأة وأن كل ما الحاجة كانت غريبة زاد تعلقهم بيها ، خليني اقولك عن موقف حصل في حفلة من الحفلات المطربة العالمية كاتي بيري
انتشر فيديو وناس كتير علقت عليه بشكل كبير لما واحد من المعجبين كان جايب هدية للمطربة كاتي بيري والهدية ديه كانت عبارة عن لابوبو ، بس رد فعل المطربة كان غريب ، لأنها مجرد ما شافت الهدية ضربتها بالمايك رميتها وقالت في المايك بصوت عالي
No labubu
الي ممكن يكون مرعب بجد هو أنك لو شوفت اي بوست او فيديو في اي منصة بيتكلم عن لابوبو ، هتلاقي في التعليقات بعض ناس بتحكي مواقف او حاجات مش منطقية حصلتلهم من ساعة ما جابوا الدمية ديه ومن اشهر الحاجات ديه ظهور خدوش على الجسم بدون سبب، بس انا بقول بعض ، لأن بردو فيه ناس كتير بتكدب الكلام ده وبتقول انه تخاريف و أن عندهم الدمية ومشافوش منها اي شئ من الي بيتقال عنها
بس كده يا سيدي و زي ما قولتلك انا معنديش دليل على اي كلام من المنتشر ده ، انت تقدر تصدق او تعتبره مجرد تخاريف او تقدر تاخد المعلومات ديه وتدور وراها بنفسك ، بس لو هتسألني عن وجهة نظري الشخصية فا انا مش بقتنع اوي بالحاجات ديه
الحاجة الوحيدة الي ممكن اقتنع بيها هو ان العرايس او الدمي في العموم مش لابوبو بس ممكن يسكن فيها الجن والشياطين خصوصًا كمان أن بيتم استخدامهم في نوع من السحر اسمه الفودو
