الحياة مدرسة… وفي مدرسة الحياة مفيش سن بقلم الاعلاميه د/ غاده قنديل أخطر كذبة في مجتمعنا إن العمر لوحده كفاية. إن الكِبر خبرة، وإن الزمن بيعلّم تلقائي. والحقيقة المؤلمة إن في ناس عاشت كتير… وما اتعلمتش حاجة. في المجتمع، بنشوف كبار في السن بس بعقول لسه في أول الحصة. تعاند، تحكم، تهاجم، وترفض أي فكرة جديدة بحجة "إحنا عارفين الدنيا". الحياة مدرسة اجتماعية قاسية، اللي ما يتعلمش فيها يتحول لعبء على نفسه وعلى اللي حواليه. الأنانية، التسلّط، التقليل من الآخرين، والتدخل في حياة الناس مش علامات خبرة… دي رسوب اجتماعي صريح. في مدرسة الحياة: الاحترام مادة أساسية، والتواضع امتحان نهائي، واللي ينجح في التعامل مع البشر أنجح من ألف صاحب منصب أو لقب. مجتمعنا محتاج يفهم إن: مش كل كبير واعي، ومش كل صغير متهور، وإن اللي يرفض يتعلم من الحياة بيشيخ… من غير ما ينضج. الحياة ما عندهاش مجاملة اجتماعية، إما تطوّر نفسك، إما تفضل واقف والدنيا تعدّي من جنبك
